चौरजहारीमा नगर भवन सहित ८ वडा भवन बन्दै

स्थानीय सरकार

Home
स्थानीय सरकार
चौरजहारीमा नगर भवन सहित ८ वडा भवन बन्दै

चौरजहारीमा नगर भवन सहित ८ वडा भवन बन्दै नगर भवन अर्काे र वडा भवन यसै वर्ष बनिसक्ने ।

कखरा संवाददाता शुक्रबार, फागुन १४, २०७७

नगर भवन निर्माणकाे काम हुँदै ।

रुकुम पश्चिमको चौरजहारी नगरपालिकाले नगर भवन सहित ८ वटा वडा कार्यालय भवन निर्माण गर्दै छ । नगरपालिकाले अर्को आर्थिक वर्षमा सक्ने गरी नगर भवनको र यसै आर्थिक वर्ष भित्रमा सक्ने गरी ८ वटा वडा कार्यालय भवन निर्माणको काम जारी रहेको बताएको छ । ४० कोठा भएको ५ तले नगर भवन निर्माण हुँदै छ । भवनको बढी काम यो वर्ष नै सकिने र अर्को वर्ष फिनिसिङको काम हुने नगर प्रमुख विशाल शर्माले जानकारी दिनुभयो । यो भवन १ करोड ८० लाखमा निर्माण हुँदै छ । भवन निर्माणका लागि नयाँ सहरी आयोजना चौरजहारीले आर्थिक सहयोग गरेको नगर प्रमुख शर्माले बताउनुभयो ।

हाल नगरपालिका कार्यालय रहेको वडा नं. २ को विजयश्वरीमा नै भवन निर्माण भइरहेको छ । यसअघि कार्यालय रहेको भवन भत्काएर सोही ठाउँमा भवन निर्माण भइरहेकाले नगरपालिकाको सेवा सोही ठाउँका रहेको एउटा विद्यालयबाट प्रवाह भइरहेको नगरपालिकाले जनाएको छ । त्यस्तै नगरका वडा नं. १, २, ३, ४, ९, १०, ११, १३ र १४ नम्बर वडा कार्यालय भवन पनि निर्माण भइरहेको नगर प्रमुख शर्माको भनाई छ । उहाँका अनुसार वडा नं. १, २ र ४ को भवन अन्तिम चरणमा पुगेको र अन्य वडाका भवन निर्माण पनि यसै आर्थिक वर्ष भित्रमा सक्ने लक्ष अनुसार काम भइरहेको छ ।

एउटा वडा कार्यालय भवन ४२ लाखमा निर्माण हुँदै छ । वडाका भवन निर्माणमा प्रधानमन्त्री र मुख्यमन्त्री रोजगार कार्यक्रमको बजेट हालिएको छ । अपुग भएको बजेट नगरपालिकाले व्यवस्थापन गर्ने छ । अहिले नगरका सबै १४ वटै वडा भाडाको घरमा संचालन भइरहेका छन् । भाडाको घरमा बस्नुपर्दा आर्थिक भार पर्नुका साथै सेवा प्रवाहमा समस्या भइरहेकाले वडाका आफ्नै भवन निर्माण गर्न लागिएको नगरपालिकाले जनाएको छ । नगर र वडा भवन संघीय मापदण्ड अनुसार एउटै डिजाईनमा निर्माण भइरहेका छन् । बाँकी वडाका भवन अर्को वर्ष निर्माण हुने नगर प्रमुख शर्माले जानकारी गराउनुभयो ।

आफ्नै भवनमा कार्यालय भएपछि सेवा प्रवाहमा सहज हुनुका साथै आर्थिक भार केहि कम हुने नगरपालिकाले विश्वास लिएको छ । एकै वर्षमा यति धेरै भवन निर्माण गर्न लागेको चौरजहारी नगरपालिका पहिलो स्थानीय तह हो । जिल्लामा कुल ६ स्थानीय तह र ७३ वडा रहेकामा अधिकांश वडा भाडाकै घरमा संचालन भइरहेका छन् ।अहिलेसम्म जिल्लाका कुनैपनि स्थानीय तहले आफ्नै भवन निर्माण गरिसकेका छैनन् । बाँफिकोट गाउँपालिकाको भवन निर्माणको काम लामो समय देखि जारी छ । अन्य स्थानीय तहले आफ्नै भवन निर्माणको काम सुरु गरिसकेका छैनन् ।

प्रकाशित मिति: शुक्रबार, फागुन १४, २०७७ १२:०३