नेपाली कम्युनिस्ट पार्टी (नेकपा)का संयोजक तथा रुकुम पूर्वबाट प्रतिनिधि सभा सदस्यका उम्मेदवार पुष्पकमल दाहाल प्रचण्डले मतदातासँगको भेटघाट कार्यक्रमलाई तीव्रता दिनुभएको छ । माघ २९ गते आफ्नो चुनावी क्षेत्र रुकुम पूर्व प्रवेश गर्नुभएका प्रचण्डले जिल्लाका विभिन्न ठाउँका मतदातासँगको भेटघाट कार्यक्रमलाई तीव्रता दिनुभएको हो । उहाँ सात दिने मतदाता भेटघाटका लागि आफ्नो चुनावी क्षेत्र आएको नेकपा रुकुम पूर्वले जनाएको छ ।

सात दिने मतदाता भेटघाट कार्यक्रमका लागि रुकुम पूर्व आउनुभएका प्रचण्ड गत शुक्रवार लाबाङ पुग्नुभएको थियो  । त्यहाँ पुगेर धेरै काम गर्न बाँकी रहेको  र त्यो काम गर्ने प्रतिबद्धता व्यक्त गर्नुभएको थियो । त्यस्तै उहाँले महतवासीसँग पनि भेटघाट गर्नुभयो । खाबाङ बगरमा आयोजित जनयुद्ध दिवस कार्यक्रममा सहिद, बेपत्ता परिवार र घाइतेलाई सम्मान गर्नुभयो । 

गत शनिवार चुनबाङको भेरी डाँडा, युद्ध संग्रहालय र ऐतिहासिक बैठक स्थल अवलोकन गर्नुका साथै मतदातासँग भेटघाट सक्काएर  पुथाउत्तरगंगा गाउँपालिकाको पर्यटकीय स्थल तकसेरा पुग्नुभयो । त्यहाँ पुगेर उहाँले तकसेराको सडक पूर्वाधार, भाषा र संस्कृतिको संरक्षणका लागि प्रतिबद्धता समेत जनाउनुभयो ।  

आइबार तकसेरामा दलित समुदायसँग भेटघाट गर्नुभयो ।  सोही दिन बाछीगाउँ, बिर्गुङ, पदमी, ओख्मा, डिम्बुरगैरा तातोपानी, मयाङ लगायतका ठाउँमा जनभेटघाट सहित तामाखानी–फलामखानीको सम्भावनाबारे स्थानीयसँग छलफल गर्नुभयो । त्यसपछि उहाँ मैकाेट पुग्नुभयाे । प्रधानमन्त्री छँदा हेलिकप्टरबाट मैकोट आउनुभएका प्रचण्ड यसपटक सडक मार्ग हुँदै त्यहाँ पुग्नुभएको थियो । 

मैकोटवासीलाई सम्बोधन गर्दै उहाँले भन्नुभयो-“क्रान्तिको किल्ला रुकुम पूर्व अब विकासको नयाँ मोडेल बन्नेछ। समुदायमा आधारित समाजवादको सुरुवात यहीँबाट हुन्छ।” मगर, दलित, ठकुरीको सामूहिक बसोबास र संस्कृतिलाई समाजवादको पूर्वाभ्यास भन्दै उहाँले रुकुमेली जनतामा समाजवादको रगत रहेको बताउनुभयो । आज भने उहाँ पुथाउत्तरगंगा गाउँपालिका वडा नम्बर १२ को कोल लगायतका आसपासका क्षेत्रका मतदातासँग चुनावी भेटघाट भएको छ ।

प्रचण्डको अझै जिल्लामा ३ दिन चुनावी भेटघाट कार्यक्रम रहेको र सोही दिनको अवधिमा पुथाउत्तरगंगा गाउँपालिकाको विभिन्न ठाउँका मतदातासँग भेटघाट गर्ने कार्यक्रम रहेको नेकपा रुकुम पूर्वले जनाएको छ । प्रचण्डसँगै समानुपातिक उम्मेदवार उपेन्द्रलाल कामी, सुनिता बुढा र नेताहरू पूर्णबहादुर घर्ती, गणेशमान पुनलगायतका नेताहरू हुनुहुन्छ । रुकुम पूर्वमा अन्य राजनीतिक दलहरूले चुनावी प्रचार गरे पनि सुस्त देखिएका छन् ।