मनकारी कार्यालय सहयोगी जसले वडा कार्यालय बनाउन निःशुल्क जग्गा दान गरे

समाज

Home
समाज
मनकारी कार्यालय सहयोगी जसले वडा कार्यालय बनाउन निःशुल्क जग्गा दान गरे

मनकारी कार्यालय सहयोगी जसले वडा कार्यालय बनाउन निःशुल्क जग्गा दान गरे

कखरा संवाददाता सोमबार, जेठ ३०, २०७९

सानीभेरी गाउँपालिका ११ को वडा कार्यालय बनाउन निःशुल्क जग्गा दान गर्ने विर्खबहादुर ओली ।

रुकुम पश्चिमको सानीभेरी गाउँपालिका ११, को कार्यालय बनाउन जग्गा प्राप्त भएको छ । निःशुल्क प्राप्त भएको जग्गा वडा कार्यालको नाममा पास समेत भइसकेको छ । ८ लाख बढी मूल्य पर्ने जग्गा दान गर्ने व्यक्ति हुनुहुन्छ, विर्खबहादुर ओली । सामान्य परिवारका ओलीले ३ सय बर्गमिटर जग्गा वडा कार्यालको नाममा पास गरिदिनुभयो ।

स्वास्थ्य चौकीमा कार्यालय सहयोगीको रुपमा कार्यरत ओलीले वडा कार्यालयलाई निःशुल्क जग्गा दान गर्नुभएको हो । काफलबोटमा बाली लगाइरहेको जग्गा उहाँले वडा कार्यालयको नाउँमा पास गरिदिनुभएको हो । वडा र गाउँको विकासका लागि आफूले सक्दो जिम्मेवारी पूरा गरेको ओलीले बताउनुभयो ।

‘वडा, गाउँपालिका, जिल्ला र देश बनाउन कुनै कुनै रुपमा नगरिकको सहयोग हुनुपर्छ जस्तो लाग्छ यसैले मैले पनि सकेको सहयोग गरेको हुँ,’ ओलीले भन्नुभयो, ‘वडा कार्यालय बनेपछि नागरिकलाई सेवा लिन र सेवा प्रवाह गर्न सजिलो होस् भन्ने चाहेको छु ।’ हाल वडा कार्यालय भाडाको घरमा सञ्चालन भइरहेको छ । चालु आर्थिक वर्षमा जग्गा भएको ठाउँसम्म सडक पुर्याउने, घडेरी मिलाउने र आगामी आर्थिक वर्षमा वडा कार्यालय भवन निर्माण गर्ने योजना बनाइएको वडाध्यक्ष भूपालसिङ ओलीले बताउनुभयो ।

प्रकाशित मिति: सोमबार, जेठ ३०, २०७९ ०६:३३