रुकुम पश्चिमबाट पहिलो पटक ७ जना सांसद

प्रतिनिधि/प्रदेशसभा निर्वाचन २०७९

Home
प्रतिनिधि/प्रदेशसभा निर्वाचन २०७९
रुकुम पश्चिमबाट पहिलो पटक ७ जना सांसद

कखरा संवाददाता आइतबार, मंसिर २५, २०७९

प्रतिनिधि र प्रदेश सभा सांसदहरू ।

रुकुम पश्चिमले पहिलो पटक ७ जना सांसद पाएको छ । मंसिर ४ गते भएको प्रतिनिधि र प्रदेश सभा निर्वाचनबाट जिल्लाले प्रत्यक्ष र समानुपातिक तर्फ गरि ७ जना सांसद पाएको हो । सबैभन्दा बढी सांसद नेकपा माओवादी केन्द्रका ४ जना छन् । भने नेकपा एमालेका २ र नेकपा एकीकृत समाजवादीबाट एक जना सांसद बनेका छन् । माओवादीबाट प्रत्यक्षबाट ३ जना तथा समानुपातिकबाट १ जना सांसद बन्दा एमाले र समाजवादीबाट समानुपातिक तर्फबाट सांसद बनेका हुन् । यद्धपि पार्टीले टुंगो लगाएका समानुपातिक सांसदलाई निर्वाचन आयोगले मान्यता दिन बाँकी छ । कर्णाली प्रदेश सभामा माओवादी केन्द्रले मिलन खड्कालाई सांसद बनाएको छ । त्यस्तै प्रत्यक्षबाट माओवादीका जनार्दन शर्मा प्रतिनिधि सभा तथा राजकुमार शर्मा र महेन्द्र केसी प्रदेश सभामा निर्वाचित भइसक्नुभएको छ ।

नेकपा एमालेले समानुपातिक तर्फ रुकुम पश्चिमबाट एक जनालाई प्रतिनिधि सभा सदस्य र एक जनालाई कर्णाली प्रदेश सभा सदस्य बनाएको छ । चन्द्रबहादुर बिकलाई प्रतिनिधि सभा सदस्य बनाएको एमालेले तुलसा मल्ललाई कर्णाली प्रदेश सभा सदस्य बनाएको हो । एमालेले २०७४ मा भएको निर्वाचनबाट पनि दुई जना समानुपातिक सांसद पाएको थियो । तर प्रदेश सभा सदस्य देवी ओली नेकपा एमालेबाट छुट्टिएर बनेको नेकपा एकीकृत समाजवादी तर्फ लाग्नुभएको थियो । प्रतिनिधि सभामा भने एमालेबाट तिर्था गौतम सांसद हुनुहुन्थ्यो । २०७४ मा रूकुम पश्चिमले ६ जना सांसद पाएकाे थियाे ।

कर्णाली प्रदेशमा एउटा मात्र प्रदेश समानुपातिक सांसद पाएको नेकपा एकीकृत समाजवादीले रुकुम पश्चिमकी कल्याणी खड्कालाई सांसद बनाएको छ । जिल्लाबाट पहिलो पटक ७ जना सांसदले संघ र प्रदेश सरकारमा प्रतिनिधित्व गर्ने भएका छन् । जसमा २ जना प्रतिनिधि सभाका सांसद रहेका छन् भने ५ जना प्रदेश सभाका सांसद छन् ।

प्रकाशित मिति: आइतबार, मंसिर २५, २०७९ १२:५१