मंसिर ४ गते भएको प्रतिनिधि सभा र प्रदेश सभा निर्वाचनमा रुकुम पश्चिमबाट उम्मेदवार बनेका ६ जनाको धरौटी जफत भएको छ । कुल सदर मतको १० प्रतिशत मत नपाउने ६ जनाको धरौटी जफत भएको मुख्य निर्वाचन अधिकृतको कार्यालयले जनाएको छ ।
कार्यालयका अनुसार धरौटी जफत हुनेमा ४ जना प्रतिनिधि सभा सदस्यका उम्मेदवार रहेका छन् भने २ जना प्रदेश सभा सदस्यका उम्मेदवार छन् । प्रतिनिधि सभा सदस्य निर्वाचन तर्फ राप्रपाका दिपककुमार मल्ल, मंगोल नेशनल अर्गनाइजेशनका हरिबहादुर पुन तथा स्वतन्त्र उम्मेदवारहरु तारक केसी र राजन पाण्डेको धरौटी जफत भएको छ ।
उनिहरु मध्य राप्रपाका मल्लले ७ सय ९६, मंगोल नेशनलका पुनले २ सय ८, स्वतन्त्र उम्मेदवार केसीले ३ हजार ५ सय ६७ र अर्का स्वतन्त्र उम्मेदवार पाण्डेले २ सय १४ मत पाउनुभएको थियो । प्रतिनिधि सभा तर्फ कुल ५७ हजार २ सय ९५ मत सदर भएकामा जमानत जोगाउन त्यसको १० प्रतिशत अर्थात ५ हजार ७ सय ३० मत आवश्यक थियो ।
प्रतिनिधि सभामा नेकपा माओवादी केन्द्रका जनार्दन शर्मा ३९ हजार ५ सय ४९ मत ल्याएर विजयी हुनुभयो । एमालेका नन्दराम देवकोटाले १२ हजार ९ सय ६१ मत पाउनुभएको थियो ।
त्यस्तै प्रदेश सभा तर्फ २ वटा निर्वाचन क्षेत्र रहेकामा दुवै क्षेत्रमा राप्रपाका उम्मेदवारको धरौटी जफत भएको छ । प्रदेश सभा १ मा विनोदकुमार मल्लको धरौटी गुम्दा २ मा निर्जल केसीले धरौटी जोगाउन नसकेको मुख्य निर्वाचन अधिकृतको कार्यालयको भनाई छ । मल्लले १ हजार ११ मत पाउँदा केसीले १ हजार १ सय ७ मत पाउनुभएको थियो ।
प्रदेश सभा १ मा २८ हजार १ सय २५ मत सदर भएकामा धरौटी जोगाउन त्यसको १० प्रतिशत अर्थात २ हजार ८ सय १३ मत ल्याउनुपर्ने थियो भने प्रदेश सभा २ मा २९ हजार ३ सय ४५ मत सदर हुँदा धरौटी फिर्ताका लागि २ हजार ९ सय ३५ मत आवश्यक थियो ।
प्रदेश सभा १ मा नेकपा माओवादी केन्द्रका महेन्द्र केसी १९ हजार ३३ मतका साथ विजयी हुँदा एमालेका नारायणकुमार शाहले ८ हजार ८१ मत पाउनुभएको थियो । प्रदेश सभा २ मा पनि नेकपा माओवादी केन्द्रकै राजकुमार शर्मा २० हजार १ सय ६० मत पाएर विजयी हुँदा एमालेका कर्णबहादुर घर्तिले ८ हजार ७८ मत पाउनुभएको थियो ।
1675054956.jpg)
